Chanterai por mon corage Que je vueill reconforter Car avec mon grant damage Ne vueill morir n’afoler Quant de la terre sauvage Ne voi nului retorner Ou cil est qui m’assoage Le cuer, quant j’en oi parler Dex, quant crieront outree Sire, aidiez au pelerin Por qui sui espoentee Car felon sunt Sarrazin! Soufferai mon lonc estaige Tant que l’an voi trespasser Il est en pelerinage Dont Dex le lait retorner! Car, au gré de mon lignage Ne quier ochoison trover D’autrui face mariage Mult est fox qui en veut parler Dex, quant crieront outree Sire, aidiez au pelerin Por qui sui espoentee Car felon sunt Sarrazin! De ce sui au cuer dolente Que cil n’est en Biauvoisis En qui j’ai mise m’entente Je nen ai ne gieu ne ris S’il est biaus et je sui gente Sire Dex, por que L feïs? Quant l’uns a l’autre atalente Por coi nos as departis? Dex, quant crieront outree Sire, aidiez au pelerin Por qui sui espoentee Car felon sunt Sarrazin De ce sui en bone atente Que je son homage pris Quant l’alaine douce vente Qui vient devers le païs Ou cil est qui m’atalente Volentiers I tor mon vis Adont m’est vis que je L sente Par desoz mon mantel gris Dex, quant crierontoutree Sire, aidiez au pelerin Por qui sui espoentee Car felon sunt Sarrazin De ce sui mout deceüe Que ne fui au convoier Sa chemise qu’ot vestue M’envoia por embracier La nuit, quant s’amors m’argue La met delez moi couchier Toute nuit a ma char nue Por mes malz assoagier Dex, quant crieront outree Sire, aidiez au pelerin Por qui sui espoentee Car felon sunt Sarrazin