Mien machteg Wad wat heb k die mist,
Dien zulver en dien gold.
k Krieg kibbevel, k heb kolle rillens
Ik pruif het zaand en t zolt.
Mien machteg Wad wat hôl k van die,
k Wil zo geern op die voaren.
Hier stoa k mit poten weer in dien sliek,
k Wor hier vannijs geboren.

Op Röpmerploat bruit lepeloar,
De wind zingt t hoogste laid.
Kleuren veraandern, de wolken dij speulen,
En meulens rusten nait.
Ik proat mit Klaas, de "Harder"voart,
Op Börkum schient de zun.
De golven, netuur het t hier veur t zeggen,
Veur mie is t nij begun.

De Koap staait tröts op Oog te kieken,
n stried liekt hier verloren.
De Noordzee luit zien kracht eem zain,
Dij zee mit zien gevoaren.
De locht kleurt rood, t geluud droagt wied,
Weer n dag is bienoa om.
k Beloof miezulf, hail zaacht vanzulf,
Mien Oog, ik kom weerom!

En in mien dreumen, dijzulfde nacht,
Din stoa ik op de Koap.
En tel doar wulpen en wilsters,
Ik sliester deur mien sloap.
Gestoag wodt t beeld wat klaainer,
En zai k wat voag n kind.
k Heb n stukkie van miezulf doar loaten,
Joaren leden aal , mit de wind…..